三家媽煮得一手好餸，逢年過節憑一人之力都可以弄得佳餚滿桌。但令我整個童年印象最深刻既反而係阿媽整既呢道：白灼米粉。
細個每朝臨返學，阿媽都會整呢道淡如水既白灼米粉比我地做早餐，有時搭兩條菜，有時搭點肉片。每朝阿媽都會叫我飲埋D湯，話對身體好，而我總會食到拿口拿面，百思不得其解點解要飲埋D咁淡既湯。同同學傾起食D咩做早餐，我從來寧願呃人話自己食麵包配果汁，都唔敢同人提起自己朝朝食白灼米粉咁丟臉。知道人地食蛋糕食麥片配牛奶會覺得好羨慕。因為覺得好西式好高級，彷彿係富家子花輪同學先會食既野。
呢種莫名既自卑感一直維持到我大個，一直都冇將白灼米粉既事同任何人講。都係最近問番阿媽先知，原來我一直以為用滾水做既湯底，係媽媽前一晚漏夜用豬骨或者魚淆出黎既湯。只因為我同家姐細個時揀飲擇食，阿媽怕我地冇營養會長唔高，所以不辭勞苦日日整。細個唔識食將媽咪既苦心當係草，大個先知道原來係寶。
到大個左自己嫁左黎外國，食麵包食西餐就真係食到拿口拿面。我好掛住阿媽整既白灼米粉呀，更加掛住以前同媽咪同住，日日可以食佢親手煮既飯既果段日子。尤其是睇完條片真係淚流滿面，希望大家都能夠愛得及時，媽媽我愛你！
#專業廣告一則 #刀嘜55週年 #時代變媽媽的愛不變 #始終都是媽媽好 #最難忘媽媽的味道
Search